சந்திப்பிழையின்றி எழுதுவோம்.

                     சந்திப்பிழையின்றி எழுதுவோம். 

                                                                    

              

     இன்றைய எழுத்து வழக்கில் நாம் அதிகம் செய்யும் சந்திப்பிழைகள் சிலவற்றைச் சொல்வதை நோக்கமாகக் கொண்ட பதிவு இது

           எங்கள் தமிழ்மொழி எங்கள் தமிழ்மொழி

           என்றென்றும் வாழிய வே!

-என்று பாடி மகிழ்ந்தார் நம் மகாகவி பாரதி.

           எழுதுகின்ற பொழுது நாம் அறிந்தோ... அறியாமலோ பிழை ஏற்பட்டுவிடுவது தவிர்க்கமுடியாததாகிறது.   பிழையைத் தவிர்த்துப் பிழையின்றி எழுதவேண்டி............!

                                                       

      மெய்யெழுத்துகளில்  க், ச், ட், த், ப், ற் என்ற ஆறும் வல்லெழுத்துகள்.  இவற்றில் ட்,ற் என்பன சந்தி எழுத்துக்களாக வாரா.

           வல்லின மெய் ‘க், ச், ட், ப், ற்’ என்ற ஆறும்... தமிழ்மொழியில் எந்தத் தமிழ்ச்சொல்லிலும் மேற்கண்ட எழுத்துகள் பக்கத்து பக்கத்தில் வராது என்பதை நாம் அறிந்து கொள்வோம்.

            (எடுத்துக்காட்டு:  கற்ப்பிக்க[கற்பிக்க],  கற்ச்சிலை[கற்சிலை], ....)

                              வல்லினம் மிகும் இடங்கள்:

      நிலைமொழிச் சொற்களுக்குப் பின், வருமொழிச் சொற்கள் வந்து புணரும்போது க், ச், த், ப், ஆகிய வல்லொற்றுகளின் வருக்க எழுத்துகள் வந்தால், அவ்வல்லொற்றுகள் சில இடங்களில் மிகுந்தும், சில இடங்களில் மிகாமலும் வரும்.  வல்லினம் மிகும் இடங்களைப் பார்ப்போம்.

   வேற்றுமை உருபு வெளிப்படையாக அமைந்தால் அந்த சொற்றொடர்களை வேற்றுமை விரி அல்லது தொகா நிலைத் தொடர் என்று அழைக்கின்றோம்.

   நீரைக் குடித்தான் (நீர் + ஐ) இதில் இரண்டாம் வேற்றுமை உருபு (ஐ) தெளிவாகத் தெரிகிறது.  எனவே இத்தொடர் இரண்டாம் வேற்றுமை விரி.

   வேற்றுமை உருபு தொக்கு (மறைந்து) வந்தால் அந்த சொற்றொடரை வேற்றுமைத் தொகை அல்லது தொகை நிலைத் தொடர் என்று அழைக்கின்றோம்.  

    நீர் குடித்தான். (நீர் + ஐ +  குடித்தான்) இதில் இரண்டாம் வேற்றுமை உருபு (ஐ) தொக்கு (மறைந்து) வந்துள்ளது.  அதனால் இத்தொடர் இரண்டாம் வேற்றுமைத் தொகை எனப்படும்.    1.இரண்டாம் வேற்றுமை (ஐ) விரியின் பின் (வெளிப்படையாக) வரும் வல்லினம் மிகும்.

                                   

         நெல்லை கண்டான்

         நெல்லைக் கண்டான்

 இங்கு இந்த இரண்டு சொற்றொடரிலும் ஒரு க் மட்டும்தான் சேர்ந்துள்ளது.

ஆனால் பொருள் வேறுபடுகிறது.

      நெல்லை கண்டான் என்றால் நெல்லை நகரத்தைக் கண்டான் என்பது பொருள்.

      நெல்லைக் கண்டான்நெலஎன்றால் நெல் மணியைக் கண்டான் என்று பொருள்படும். எனவே இரண்டாம் வேற்றுமை உருபான ஐ சொல்லின் இறுதியில் சேர்ந்தால் அங்கு வல்லினம் மிகுந்து வரும்.

     

  1.   முருகனின் கையில் இருக்கும் வேலைக் (வேல்+ஐ) காணவில்லை!

(வேற்றுமை உருபு வந்தால் மட்டும் வல்லினம் மிகும்)

        வினோத் படித்து முடித்த பிறகும் வேலைகிடைக்கவில்லை.

(சொல்லே ‘ஐ’ யில் முடிந்தால்வல்லினம் மிகாது.)

                  (வல்லினம் மிகும்)

    நான் சென்னையைச் சென்றடைந்தேன்.

    அவன் கொலையைச் செய்தான்.

                                         

(எ.டு) :  (வல்லினம் மிகாது)

           நான்   சென்னை சென்றேன்.

    அவன் கொலை செய்தான்.

 (சொல்லே ‘ஐ’யில் முடிந்தால் வல்லினம் மிகாது).

    

      

2.நான்காம் வேற்றுமை (கு) விரியில் வரும் வல்லினம் மிகும்

     கண்ணனுக்கு மகன் (கண்ணன் + கு) இதில் நான்காம் வேற்றுமை உருபு (கு) வெளிப்படையாக உள்ளது.  அதனால் இத்தொடர் நான்காம் வேற்றுமை விரி.

     கண்ணன் மகன். (கண்ணன் + கு + மகன்) இதில் நான்காம் வேற்றுமை உருபு (கு) மறைந்துள்ளது.  எனவே இத்தொடர் நான்காம் வேற்றுமைத் தொகையாகும்.

    (எ.டு) அவனுக்கு +  தா = அவனுக்குத் தா

          அண்ணனுக்கு + சோறு = அண்ணனுக்குச் சோறு

3. அ, இ, உ சுட்டெழுத்துகளின் பின், எ என்னும் வினா எழுத்தின் பின்னும்

அப்பழம், இக்கல் ,  எச்செடி

   அந்த, இந்த, எந்த என்னும் சொற்களின் பின் வரும் வல்லினம் மிகும்.

அந்தப்பக்கம், இந்தக்கண், எந்தச்சாலை

4. அப்படி, இப்படி, எப்படி என்னும் சொற்களின் பின்

   அப்படிச்செல், இப்படிப்பார், எப்படிச்செய்தாய்,

5.ஓர் எழுத்து ஒருமொழியில் வரும் க், ச், த், ப் மிகும்

   தீப்பந்தம், பூச்செண்டு, கைத்தடி, தைத்திங்கள்.

6.வன்றொடர்க் குற்றியலுகரத்தின்பின் வரும் வல்லினம் மிகும்.

   தேக்குப் பலகை, நச்சுப் பொய்கை,

பாட்டுப்பாடு, கூத்துப்போடு, தப்புக்கணக்கு, கற்றுக் கொண்டான்.

(ஏனைய குற்றிலுகரங்களில் பொதுவாக மிகாது)

7.அகரஈற்றுச் ‘செய’ என்னும் எச்சத்தின்பின் வரும் வல்லினம் மிகும்.

  பாடக் கேட்டேன், தேடச் சென்றாள், பாடத் தெரியுமா? ஓடப்பார்த்தான்.

8.இகர ஈற்றுச் ‘செய்து’ என்னும் எச்சத்தின்பின் வரும் வல்லினம் மிகும்.

  தேடிப்பார், ஒடிப்போனாள்.

9.சால,தவ என்னும் உரிச் சொற்கள் பின் வரும் வல்லினம் மிகும்.

   சாலச் சிறந்தது, தவப் பெரிது.

10.ஈறுகெட்ட எதிர்மறைப் பெயரெச்சத்தின்முன் வல்லினம் மிகும்.

   ஓடாக் குதிரை, அழியாப்புகழ்.

11. பண்புத்தொகையில், இருபெயரொட்டுப் பண்புத் தொகையில்வல்லினம் மிகும்.

   பச்சைப்பட்டு,                   சாரைப்பாம்பு.

12.உவமைத்தொகையில் வல்லினம் மிகும்

    மலர்க்கண், தாமரைக்கை

             படைப்பாளர்களாகிய நாம் படைக்கின்ற பொழுது பிழையின்றி நல்ல தமிழில் படைக்க முயற்சிப்போம்! 

                        முயற்சி திருவினையாக்கும்!

                                                  வல்லினம் மிகா இடங்கள் வரும்...

                                                                                 தொடரும்..........